Князья Вишневецкие. Источники

Ѻ̓́зна``мую и̉ вѣдомо чиню̀ тымъ ли̓́стомъ мои̉мъ, кому бы ѡ̉ томъ вѣдати налѐжало, и̉жъ ӕ̓́ с̾ пови^н̑ностѝ мое́ѝ хр^с̑тиа^н̑скоѝ, помнечѝ тежъ волю и̉ пре^л̑сев̾зӕ^т̑е /н҃/ сла́вноѝ памӕти, кн҃жати михаи́ла вишневѐцкого корыбута, ми́лого ма^л̑жо^н̑ка мое́го, и̉мене^м̑ его̀ вла́снымъ, фү^н̑дүшомъ ты^м̑ мои́мъ теперь с̾твержаю и̉ з̾моцнӕ́ю монастырѣ моѝ, которые сүть на үкраи̉нѣ, за днѣпро^м̑, по^д̑ прилу́кою, единъ гүсты^н̑ски``, а дрүги`` под̾горски``, зо всѣми и̉хъ кгру^н̑тами и̉ хуторами̉, которые до тыхъ монастыровъ нале́жатъ, при густы^н̑скомъ: мацѣевка хүторѐцъ, а при по^д̑горскомъ лади^н̑ка, и порүчаю во владзү и̉ мо́цъ и̉ до животъное ѡ̉блада^н̑е вышеменованые монастырѣ моѝ ѿц҃ү и̉саїѝ, їгүмену тых̾ же монастыре``, кото́рые и̉ пере^д̑ тымъ во влад̾зѣ и̉ ѡ̉пецѣ свое`` мѣлъ, кото́рымъ ѡ̉нъ и̉ поча^т̑комъ бы́лъ, и̉ кгру^н̑тъ ведлу^г̑ росказанӕ славноѝ памӕти̉ кн҃жате михаи̉ла вишневецкого, мило̀го мал̾жо^н̑ка мое́го, до тыхъ мн^с̑тровъ пред̾ кн҃зӕ лы́ку ѡ̉грани̉че́ны и̉ назначе́ны, такъ подаю и̉ ствержаю́, ӕко сӕ в̾ собѣ тое ѡ̉граниче^н̑е листовное ѡ̉бширне`` маетъ, которых̾ то ѡ̉ни кгру^н̑товъ и̉ хуторовъ собѣ назначо́ныхъ и̉ ѡ̉граниченыхъ үживати споко``не маю́тъ, без̾ вшелӕкое перешко́ды такъ ѿ старос^т̑, ӕ̓́ко и̉ аре^н̑даре`` и̉ по^д̑даны^х̑ на́шихъ, в̾ ко-которы^х̑ то кгрүнтахъ и̉ хүторахъ во^л̑но и̉мъ бүдетъ в̾шелӕки`` пожитокъ себѣ прив̾лаща́ти и̉ примножа́ти ӕ̉ко на``пожите^ч̑нѣ``, в̾ чимъ бы ко^л̑векъ пожи́токъ собѣ мѣлѝ, во^л̑но и̉мъ будетъ и̉ млыны будова́ти ку пожи^т̑кови своемү в̾ то^м̑ же кгру^н̑тѣ, ѿ насъ назначономъ. До того те́жъ и̉ теперъ то придаю̀, абы вышъ менова́ны`` ѿц҃ъ и̉гуменъ не ты^л̑ко ѡ̉ тыхъ монастырехъ завѣдалъ и̉ и̓́ми справовалъ, але и̉ во всѣ́хъ маетъностӕхъ мои̉хъ заднѣпр̾скихъ, где еднокол̾векъ хто̀ ѿ чер̾нцовъ ес^т̑, ал̾бо ли жити̉ хотѣвъ ведлугъ во́ли бж҃еѝ, абы жа́денъ не важилъсӕ без̾ вѣдомости̉ и̉ поз̾воленӕ его̀ в̾ моемъ кгрунтѣ мешкати и̉ фундоватисӕ, и̉ абы жаде^н̑ үрӕ^д̑нїкъ, або̀ ста́роста того не поз̾волӕ̓́лъ; и̉ если бы сӕ того̀ хто̀ важилъ без̾ вѣдомости и̉ позволенӕ ѡ̓́ного, свово^л̑не мешкати и̉ фүндова́тисӕ, те́ды даю емү̀ владзу в̾шелӕ̓́кую, абы̀ того̀ свово^л̑ства заборонӕ̓́въ и̉ свово^л̑ныхъ кара́лъ; а если бы самъ тому з̾долѣти не моглъ, те́ды маетъ ему̀ моѝхъ маетносте`` дозорца, або которы`` ста́роста, додава́ти в̾ тымъ в̾шелӕкую помо^ч̑, которои̉ бы ѡ̉нъ потребова́лъ. Такъ тежъ и̉ на^д̑ сщ҃еннїками̉ свѣцкими̉ моцъ и̉ владзү даю̀, абы ведлугъ преможенӕ своего, в̾шелӕкого межи ни̓́ми рӕ̓́дү и̉ справы постерегалъ, абы ему во всемъ послушны были, що ко^л̑векъ ведлу^г̑ воли бж҃ои̉ преклада́ти имъ будетъ, абы жаденъ үрӕ^д̑нїкъ, або ста́роста, жаднои̉ церкви а ни подава́лъ, а ни ѡ̉ды``мовалъ, а́жъ перве`` ѡ̉зна``мивши̉ и̉ з̾ нимъ намо́вившисӕ во все́мъ. Моцъ даю̀ /н҃а/ и̉ порүчаю̀ тую справү и̉ то`` мн^с̑тръ непорушне ѡ̉ному до живота̀ его̀; по смерти за^с̑ ѡ̉ного братїӕ че́р̾нцѣ ѡ̉бирати̉ собѣ старшого с̾ промежку себе маю́тъ, ведлу^г̑ порӕ^д̑ку монастырского. До то^г̑ тежъ теперь придаю̀ до мн^с̑трӕ гүсты^н̑ского такъ длӕ з̾бавенӕ дш҃ѣ мое́ѝ, ӕко и̉ длӕ вѣчноѝ памӕти и̉ бг҃омолӕ, зешлого з̾ того свѣта ми́лого ма^л̑жо^н̑ка моего, ү млынѣ ва^л̑ковскомъ двѣ ко́лѣ переднѣ``шихъ, которые ѡ̉нѝ сами ѡ̉берутъ, ед̾но му^ч̑ное, а другое сту́пное, которы^х̑ ѡ̉нѝ маю́тъ үживати споко``не, без̾ вшелӕ̓́коѝ перешко́ды ѿ старос^т̑, аре^н̑даро^в̑ и̉ по^д̑даны^х̑ наши^х̑, без̾ жадноѝ тру^д̑ности и̉ старанӕ, такъ ѿ гребли, ӕко̀ и̉ ѿ будова́нӕ, млына̀ греблю са́ми подъда́ныѝ направова́ти маю́тъ. Такъ тежъ абы̀ никгды и̉хъ коламъ ӕкоѝ перешко́ды не было̀, хо^т̑ бы мѣло бы́ти воды̀ мало, теды маю^т̑сӕ спо^л̑не заровно дѣли́ти, на кола́ водою́ або чер̾гою пуща́ти. То̀ мѣстъцу ст҃ому даю̀, дарую вѣчными ча́сы, а ѡ̉ни, ӕ̓́ко бг҃омо^л̑цы на́ши, үстави^ч̑не маютъ за на^с̑ и̉ пото^м̑ки наши гд҃а бг҃а просити ѡ̉ здоровю и̉ сп^с̑нїю нш҃омү. И̉ хто бы те́жъ ко^л̑векъ тую фундацыю нш҃у нарүша́ти и̉ касова́ти в̾ пото^м̑ные часы мѣлъ, и̉ ѡ̉ды``мовати, то̀ що^с̑ мы надали ра́хъ, або на бл҃гоч^с̑тивую православную вѣрю нш҃у наступова́ти и̉ ѿмѣнӕ́ти хотѣлъ, теды неха`` на немъ будетъ клӕтва ст҃хъ ѿц҃ъ: т҃ні: и̉же бо никеѝ, и̉ розсудитъсӕ со мно́ю пре^д̑ маестатомъ бж҃їимъ. А длӕ лѣпшоѝ вѣры, ваги и̉ стверже́нӕ, даю̀ мо`` то`` листъ з̾ притисне^н̑емъ печа́ти и̉ с̾ по^д̑писомъ рүки мое́ѝ. Писанъ ү вишне^в̑цү, рокү ҂ах҃ѳі, м^с̑цӕ и̉анүариӕ а҃і дн҃ӕ.

Тутъ великаӕ печать кнзӕ вишневе́цкого їеремиӕ̓́ша.

Тутъ печа^т̑ кн҃гини вишневѐцкоѝ раи̉ны могилӕ^н̑ки, и̉ по^д̑писалсӕ сама̀: рукою вла^с̑ною.

Кн҃зь подъписалъсӕ в̾ тые слова по по^л̑ски``: Потвѥрдза^м̑ тенъ лис^т̑ мо``, І̓́еремиш̾ михалъ Корыбүтъ, ксїѡ^н̑же на вишнїѡ̓́в̾цү.

Тенъ млынъ, кторы`` з̾бүдовалъ маѯимъ мїел̾никъ по^д̑ монастыремъ, зүпе^л̑не при монастырү зоставац̾, без̾ перешкоды ѿ аре^н̑даровъ. /н҃в/

http://litopys.org.ua/

На предыдущую страницу | На главную страницу